RETO VENRES 12 DE XUÑO 2020

Ai.. chegamos ao final desta semana e só nos queda unha para rematar o curso 😢😢 Que mágoa que teñamos que rematalo así a distancia... pero bueno, o importante é coidarse!! Imos aló cunha proposta da vida cotiá que chamamos a caixa dos obxectos.

Necesitades:

• Unha bandexa.
• Diferentes obxectos, cada un cunha apertura distinta: un moedeiro, un estoxo ("estuche") con cremalleira, botes de perfume, un tarro (de enroscar, de pechar a presión), un candado, parafusos ("tornillos") e torcas...

Actividade:

Colocade os obxectos que escollestes na bandexa e as tapas por separado. O que tedes que facer é asociar cada tapa co seu bote/tarro, cada chave co seu candado, cada torca co seu parafuso, pechar a cremalleira... Non é complicado, intentadeo que é unha actividade moi interesante para practicar a motricidade fina, o que nos axudará a coller despois o lapis con maior soltura á hora de escribir.

Aquí tedes algúns exemplos:

Imaxe extraída de http://ittybittylove.blogspot.com/2008/10/new-pl-lessons.html

Imaxe extraída de https://i.pinimg.com/564x/92/51/bd/9251bdd7acfea1c66d5e8dad26ca46ab.jpg

----------------------------------

Agora como vén a fin de semana tocaban uns contiños pero hoxe imos cambialos por uns vídeos de curiosidades sobre algúns animais. Que vos parece? 😊

Agora sí, boa fin de semana!! 😘😘😘 Cargade ben as pilas para afrontar a última semana deste curso!! Haberá algunha sorpresiña 🙊

RETO XOVES 11 DE XUÑO DE 2020

Bo xoves!! Como estades de enerxía? Seguro que aínda vos queda unha poquiña para afrontar estes dous días 💪💪 

Hoxe traémosvos tres propostas de psicomotricidade así que en 3... 2... 1... Arrincamos!! 🚀

Movemento do corpo coa canción "Chuchuwa"

Imos mover un pouco o corpo ao ritmo desta canción. Estade ben atentos/as e facede o que van dicindo.

Lanzamento de bólas

Precisades un caldeiro/recipiente e tamén unhas pelotas. Se non tedes moitas podedes improvisar unhas facendo bólas de papel de xornal/revista.

Que tedes que facer? Encestar as bólas no caldeiro. Progresivamente iredes separándovos cada vez máis del, aumentando así a dificultade.

Imaxe extraída de internet

Motricidade fina con gomas

Imos poñer en marcha unha actividade proposta dende o blog Zoqueando á par do Departamento de Orientación (https://zoqueandoapar.blogspot.com/search/label/Motricidade%20fina). Tedes que coller un rollo de papel hixiénico e poñer nel diferentes gomas do pelo. Velaquí tedes unha imaxe de exemplo:

E isto é todo por hoxe 😊 Vamos que podedees!! 💪💪💪

RETO XOVES 4 DE XUÑO DE 2020

Un día máis aquí estamos cun novo reto 😊 Que tal estades? Agardamos que ben 💓 Cada vez queda menos para rematar este curso tan atípico así que imos aproveitar estes días que nos quedan.

Primeiro imos facer un xogo de adiviñar e despois un pouquiño de relaxación, vale?

ADIVIÑA, ADIVIÑA

Collede unha caixa de cartón que teñades na casa e facédelle dous buratos para poder introducir as mans. Ao outro lado da caixa teredes un recipiente con distintos obxectos e, sen mirar ⛔👀 e tan só polo sentido do tacto, debedes adiviñar de que obxecto se trata. Entendido?

Deixámosvos unha imaxe para que vos fagades unha idea do explicado.

Imaxe extraída de internet

QUE SE NOS ACABAN AS PILAS!

O obxectivo deste xogo é pasar da tensión e a actividade á relaxación e a tranquilidade. As nenas e nenos deben facer movementos co corpo segundo as indicacións que se lles dan.

Os adultos debedes dicirlle aos nenos/as o seguinte 💬: imos xogar a un xogo, imos ser robots que funcionan con pilas. Primeiro teremos as pilas novas e podemos xogar e correr con rapidez. Teredes que correr libremente dun lado ao outro da casa ou dar voltas o máis rápido que poidades.

Despois diráselle: "xa se gastou unha parte das pilas, así que agora só podedes correr máis lento. A ver como diminuides a velocidade".

Continuaredes dando ordes parecidas a esta ata que diminúan máis a velocidade e, despois dun cachiño, diráselle que as pilas están pola metade e que xa non poden correr e que só poden camiñar.

Despois diráselle: "as pilas estanse acabando e cada vez cústanos máis movernos. Cada vez movémonos máis amodo... máis amodo... máis amodo. Cada paso que damos cústanos moito máis, estamos esgotando toda a enerxía das nosas pilas e imos quedar deitados no chan un anaco".

Agora que xa estades ben relaxadiños, podedes levantarvos. Xa rematou o reto de hoxe pero non esquezades axudar á vosa familia coas cousiñas da casa que xa sodes maiores!! E xogade, claro!! 😀😀

Biquiños 😘😘😘

RETO XOVES 28 DE MAIO DE 2020

Bo xoves!! Xa estamos a piques de rematar a semana 🙊 Hoxe é día de practicar un pouco de motricidade, tanto a fina como a grosa. Vale? Imos aló cos exercicios 💁

FACEMOS UN CANCIÑO  OU PORQUIÑO DE ORIGAMI 🐶🐷

Deixámosvos uns vídeos onde se explica, paso a paso, como facer un canciño e un porquiño. Só precisades un anaco de papel e un rotulador. Animádesvos? 😀 Podedes facer os dous ou o que máis vos guste.

Quen se atreve a inventarlle un nome aos seus animaliños??

CIRCUÍTO PSICOMOTOR 💪💪

Agora deixámosvos un circuíto para facer con cousiñas que tedes na casa. Con el practicaredes salto de obstáculos, salto cos pes xuntos, superar obstáculos marcha atrás, arrastrarse...

Veña que hoxe toca mover o esqueleto!! Estamos seguras de que vos gustará 😊 Biquiños e moito ánimo 😘😘😘

RETO XOVES 7 DE MAIO DE 2020

Bo xoves!! Xa só falta un día para rematar esta semana. Imaxinamos que, a medida que pasan os días, estades máis cansos así que hoxe traémosvos uns xogos e unha proposta de relaxación. Ímosvos explicar 😊

Proposta de soplo

Precisades:

• Un pouco de plastilina para trazar o percorrido. Se non tedes, non vos preocupedes, podedes facelo cun cordón.
• Unha palliña.
• Unha pelotiña pouco pesada tipo ping-pong ou unha bóla que fagades con papel de aluminio.

Que tedes que facer?

Trazade o percorrido polo que queredes que pase a "pelota". Situádea no inicio e soprádelle cunha palliña para chegar ao final. Deixámosvos unha imaxe que vos axudará a entender esta explicación.

Xogo psicomotor

Facede un circuíto deste estilo. Empregade folios e facede as pegadas debuxándoas ou, se tedes pintura de dedos, podedes pintarlle os pés aos peques e plasmar a súa pegada. A continuación, deben realizar o circuíto. Ollo!! Andade con coidado, non vos manquedes 😊

Sesión de relaxación

Agora que xa movestes o voso corpiño, é momento de relaxarse e volver á calma. Deixámosvos un vídeo de ioga coas posturas dos animais.

Podedes animar á vosa familia a que o fagan, é unha actividade moi boa para fortalecer os músculos.

Biquiños 😘😘 coma sempre, estamos en contacto diario!! 😀 Agardamos ver fotos e vídeos 📷📷

RETO XOVES 30 DE ABRIL DE 2020

Bo día a todas e a todos!! Que tal estades?? Chegamos ao final desta semana pois mañá é festivo. Entón... preparados/as, listos/as, xaa!! Arrincamooooos.

Hoxe imos comezar practicando un pouco a nosa motricidade fina. Como o imos facer?? A través da elaboración de colares e pulseiras.

Precisades:

• Macarróns de tubo, caracois... ou similar, o que se vos ocorra: anaquiños pequenos de palliñas...
• Un fío, lá ou cordón.

Que tedes que facer? Ensartar os macarróns ou similar no fío, lá ou cordón. Deixámosvos un exemplo para que collades ideas. Podedes facer tanto pulseiras como colares.

Despois disto, imos darlle un pouco de tranquilidade ao corpo a través dunha actividade de relaxación que imos chamar "o barco de papel". Coa axuda dalgún membro da túa familia, fai un barco de papel, píntao e decórao como queiras. No seguinte vídeo podes ver como facer o barco:

Agora déitate no chan boca arriba e coloca o barco na túa barriga. Inspira e expira, verás como se move o barco como se estivese no mar. Repite isto varias veces, verás como se relaxa o corpo.

Xa para rematar, deixámosvos un contiño para a fin de semana. Neste caso, O coelliño branco. Se vos apetece podedes facer un debuxo del e escribir o seu título.

E se vos apetece ler un poema titulado "A casa", consultade o blog da biblioteca: http://equipobibliosaluis.blogspot.com/2020/04/poema-casa.html. É tan sinxeliño como bonito 😊 moi adecuado para estes días que tanto pasamos nos nosos fogares.

O luns sería un dos festivos escollidos polo centro, así que esta será unha fin de semana looooonga. Vémonos de volta o martes 😘😘😘😘

RETO XOVES 16 DE ABRIL DE 2020

Bo xoves peques!! Que tal estades?? Hoxe traémosvos dúas propostas de psicomotricidade; unha de psicomotricidade fina e outra para traballar o equilibrio. Ímosvos explicar cada unha delas:

A BANDEXA DE CORTAR

Necesitades:

• Unha bandexa.
• Unhas tesoiras adaptadas a vosa idade e dependendo de se sodes zurdos ou destros.
• Follas de papel, periódico ou revista.
• Unha bandexa para ir botando os anacos de papel recortados.

 Pasos a seguir:

• Preparade unha folla con liñas horizontais e verticais a uns 1,5 cm de separación unhas entre as outras.
• Preparade a bandexa colocando nela todo o material.
• Agora a recortar!

É importante axudar aos nenos/as a colocar os dedos nos ocos das tesoiras de forma correcta, co polgar cara arriba (sempre mirando cara o queixo) e o índice e o corazón no oco inferior, mirando cara abaixo. Explicarlle que hai que abrir e cerrar as tesoiras para cortar pois teñen moooooita fame e van mastigar para comer todo o papel que lle poñamos diante.

Lembrade que podedes ir aumentando a dificultade da actividade. Comezade por liñas rectas, logo inclinadas, curvas… Aaahh!! E non tiredes os recortes, aproveitádeos para facer algunha manualidade ou practicar a respiración. Para isto último tedes que coller unha palliña e poñela na boca, aspirar o aire á vez que poñedes o outro extremo da palla sobre o papel. Intentade cambialos de sitio. Isto é coma o que fixemos no xogo de pescar, seguro que vos acordades.

CAMIÑAR SOBRE UNHA LIÑA

Como indica o nome da actividade trátase de camiñar sobre unha liña que debuxaremos con cinta adhesiva. Tamén pode ser un lazo ou cordón fino pero tede coidado, non vaiades torcer un pé!!😰

Este xogo é progresivo e, pouco a pouco, podémoslle ir engadindo dificultade. Por exemplo, podemos comezar camiñando pola liña coas mans baleiras e sen saírnos. Despois podemos transportar un libro pequeno coas mans e, máis adiante, probar a levar un vaso de auga sen tirala ou cunha vela que debe manterse acendida (Ollo!! 👀 se usades a vela, andade con moito coidado e facédeo en presenza dun adulto, nunca sós).

Biquiños 😘😘

RETO XOVES 26 DE MARZO DE 2020

Bo xoves!! Hoxe traémosvos unha proposta para mover o corpo. Imos facer unha pirámide usando botes de iogur, latas, pezas de construción ou similar. Logo faredes unha bóla de papel de aluminio e listo para xogar. Debedes derrubar a vosa pirámide!! Ánimo, será un xogo moi divertido.

Os botes de iogur deben estar baleiros. Neste caso están cheos porque é un exemplo jijiji nada máis comamos os iogures xa podemos facer a nosa pirámide. No noso caso, como vedes, non podemos facer esta actividades ata dentro duns días, seguro que a algúns de vós tamén vos pasa.

Estaría interesante que aproveitedes para traballar tamén aspectos matemáticos: contar cantos botes hai en cada fila, en cal hai máis ou menos, facer 2 pirámides co mesmo número de botes/pezas, pensar cal é máis sinxela de derrubar... Ánimo peques!!