EXPERIENCIAS MANIPULATIVAS E SENSORIAIS DO PROXECTO "OS TESOUROS DO MEU CORPO"

Remata o 2.º trimestre e con el, na aula de 6.º de Educación Infantil, rematamos o noso proxecto "Os tesouros do meu corpo". Ademais de rexistro de datos e información, levamos a cabo diferentes experiencias manipulativas e sensoriais que nos encantaron 😍

Velaquí vos deixamos un vídeo resumo 👀

Sen dúbida, o éxito absoluto foi a estación de análises de sangue na tuff tray 😀

Tamén nos gustan moito as botellas sensoriais e estamos desexosos e desexosas de levalas para as casas pero imos deixalas no colexio uns días máis para levar ao Salón do Libro de Carballo no mes de abril 😊

QUE SON AS ARTICULACIÓNS?

As nenas e nenos de 6.º de Educación Infantil seguimos traballando sobre o corpo humano 💀💪🖐🦶. Estes días aprendemos que son as articulacións e a súa importancia 😀

PROPOSTAS DE INVERNO

Estes días, na aula de 6.º de Educación Infantil, estivemos a realizar algunhas propostas de inverno, coas que traballamos o conteo, a relación número-cantidade, convertémonos en artistas e fixemos neve ☃❄
Velaquí unha pequena mostra dalgunhas das actividades 😍 Sen dúbida o que máis nos gustou foi a neve!! Xa que aquí en Carballo non a podemos ver, conservámola na tuff tray para seguir xogando con ela 😀

AGASALLOS DE NADAL PARA A AULA DE 6.º EI

O luns 9 de xaneiro, volvemos ao colexio!! Un novo ano, moitas experiencias que contar do Nadal e novas ilusións de cara a este trimestre 😊 As nenas e nenos de 6.º de Educación Infantil dispuxémonos en semicírculo para contar o que máis nos gustou das vacacións, que fixeramos... cando nos decatamos de que había unha carta para nós colgada na clase!! Se queredes saber cal era o seu contido e que pasou a continuación, ollade este vídeo 😍

MISIÓN 6

Fidalgo deixounos onte unha nova misión do noso proxecto, a misión 6!! Desta volta coñecemos a MARTE✨

BOOO, QUE MEDO!! 6.º EI CELEBRA O MAGOSTO E O SAMAÍN

O venres no noso cole foi día de festexo pois celebramos o Magosto e o Samaín. Queredes saber que fixemos?

🎃As nenas e nenos prepararon CABAZAS TERRORÍFICAS COAS FAMILIAS. Moitas grazas pola vosa participación 💕 había verdadeiras preciosidades!!

🎃Participamos na iniciativa PRESUME DE XARDÍNS do Concello de Carballo.

🎃Preparamos MERENDAS TERRORIFICAMENTE SAUDABLES: unha cabaza de mandarinas e arándanos e tostas Frankestein con pan tostado, aguacate, queixo fresco e aceitunas negras.

🎃Degustamos MERENDAS TERRORÍFICAS, CASTAÑAS e ZUMES aportados pola ANPA. Grazas!!!

🎃Participamos en XOGOS TRADICIONAIS con elementos do outono.

🎃Escoitamos un CONTO co que nos agasallaron as profes María C. e Manuela. Canto nos gustou!! Moitas grazas profes.

ROBÓTICA NUMÉRICA

Estes días, na aula de 5.º de Educación Infantil estivemos a traballar co escornabot, un robot moi similar ao BeeBot que xa manexamos outras veces. Desta volta, traballamos o recoñecemento de números, o conteo e a súa localización nas tarxetas dos dados e dos dedos das mans.

Aprender con este tipo de robots é éxito asegurado!! 😍😍

QUEBRACABEZAS EN 5.º EI

Un destes días, entre as actividades dos recunchos atopábase un quebracabezas que nos emprestou a profe Patri. Tiña pezas moooooooi grandes e debuxos de Dory e Nemo🐠🐡 Tivemos que esforzarnos moito para montalo pero... conseguímolo!!!

Dende ese día, é un dos nos xogos preferidos 😍

Grazas profe Patri por emprestárnolo para a nosa clase 💖

XOGOS MATEMÁTICOS NO PATIO

Estes días, fai mooooito frío ⛄pero o bo é que a media mañá, o soliño quenta moito e estase moi ben fóra🌞 Na aula de 5.º de Educación Infantil estamos aproveitando para saír ao patio facer xogos e, este venres, foron moi matemáticos.

Que divertido!! Saír fóra sempre é un acerto 😍

XOGAMOS COAS CARTAS DE NÚMEROS E LETRAS

Estes días na aula de 5.º de Educación Infantil estivemos traballando cunhas cartas novas de números e letras ás que lle atopamos moitas posibilidades 😃 Queredes ver canto xogamos e aprendemos con elas? Ollade este vídeo 😍

XOGAMOS COS NÚMEROS E AS LETRAS

Boa tarde 😊 estes días, na aula de 5.º de Educación Infantil fixemos diferentes xogos para traballar cuestións de lectoescritura e de lóxica matemática:

• Buscamos letras e números.
• Pensamos palabras que comezasen por diferentes letras.
• Fixemos o son das letras.
• Démoslle indicacións ao BeeBot para que chegase ao número que indicaba o dado.
• Contamos un número determinado de elementos.
• Buscamos números.

Queredes ver que ben o pasamos? Mirade, mirade 👀

ALGUNHAS PROPOSTAS DESTES DÍAS

Ao longo dos días, na aula de 5.º de Educación Infantil realizamos moitos xoguiños que nos axudan a aprender. Desta volta queremos ensinarvos un co que traballamos cuestións de lóxica-matemática. Mirade mirade 👀

Ademais queremos amosarvos a nova decoración da porta da nosa aula. Como ao longo do curso imos traballar a igualdade relacionado coa temática do circo, quixemos disfrazarnos das persoas que nel traballan 😍

PROPOSTAS DE SETEMBRO

Benvidos e benvidas a todos e a todas!! Con esta primeira entrada damos comezo ás aventuras na aula de 4 anos. Agardamos que gocedes moito vendo os nosos traballiños, momentos de xogo, celebracións...

Comezamos amosándovos algunhas das propostas que realizamos no mes de setembro. Falamos das vacacións, de toooodo o que fixemos no verán, lemos contos, retomamos contacto cos amiguiños e amiguiñas, recordamos as rutinas da escola...

O verán é moi divertido pero no cole tamén gozamos moito todos/as xuntos/as!! 💓

SAÍMOS DE EXCURSIÓN AO BOSQUE DO AÑÓN

O pasado luns 14 de xuño, o alumnado de Educación Infantil fomos de excursión ao Bosque do Añón 🌱🌲🌳🌾🌺🌻🌼 de Carballo. Pasámolo moi moi ben e tivemos sorte de que fixo un día fantástico 🌞

Queredes ver algunhas fotiños e vídeos deste día tan especial? 👀 Ollade este vídeo que preparamos con tanto agarimo para ter de recordo desta excursión 😍

A QUE ANDAN ESTES DÍAS AS NENAS E NENOS DE 3 ANOS?

Bo día familias!! Queredes saber a que andamos estes días as nenas e nenos de 3 aniños? Pois ben, ímosvos contar.

Este xoves, aproveitando que estaba un día tan bo 🌞 fomos á horta para quitar herbas malas, revisar como estaban os nosos cultivos e plantar algún novo. Neste caso cultivamos máis amorodos, cabazas de Samaín, cabazas cacahuete e unha planta de caléndula para intentar que os bichiños non coman os nosos cultivos.

Ademais, observamos en que estado estaba a nosa horta 👀

• Os amorodos xa se deixan ver, agora teñen que medrar e madurar e seguro que moi pronto poderemos botarlle o dente 🍓🍓 
• Das cenorias non hai nin rastro, aínda non se deixan ver 🙈
• Das 11 leitugas que plantamos soamente quedan 3 😢😢 semella que aos paxariños e caracois lles encantan!! Ademais, tamén comeron as folliñas dun dos nosos pementos.
• Polo demais, todo medra con normalidade, só nos queda ter paciencia!!

Queremos contarvos tamén que os nosos vermes de seda téñennos moi intrigados 🐛🐛 Temos dúas crisálidas que xa levan un tempo formadas e, do xoves para o venres, vimos como un vermiño xa ben gordecho e grande comezaba a facer a súa, así que en total temos 3. Cando se deixarán ver as bolboretas? Estamos ansiosos/as!!!

Ademais, aconteceunos algo moi curioso!! Cando o encargado/a do día se dispoñía a darlle de comer aos vermes logo da asemblea, descubrimos que un saíra da caixa!! Estaba pousadiño na mesa do recuncho da eiruguiña. Como saíra da caixa? Non sabiamos ben, só nos quedaba axudarlle a volver a ela para que seguise comendo as súas follas de moreira.

Finalmente, contarvos que estes días incorporamos nun dos recunchos uns materiais que nos gustaron moito: pequenas pedras e cunchas de diferentes tamaños para facer moooooitas creacións e xogos 😍

Ata a próxima!! 😘

GRAFOMOTRICIDADE DIVERTIDA

Boa tarde!! Hoxe queremos amosarvos unha actividade que fixemos as nenas e nenos de 3 aniños. Estivemos pacticando exercicios de grafomotricidade con pedriñas e pompóns de cores 😀 Queredes ver que ben o fixemos?? 😍

Agora imos actualizarvos de como están os nosos vermes de seda 🐛

O venres da semana pasada, vimos que había dous vermes na parede da caixa, algo que nunca acontecera ata o momento. Por que estarían alí? Que estarían buscando?

O luns obtivemos a resposta!! Os vermes estábanse preparando para facer a crisálida 😀 A profe contounos que, durante a fin de semana, observou como ían construíndo a súa casiña, onde están aproximadamente 2 semanas ata que se converten en bolboretas. Velaquí vos deixamos unhas fotos.

Ademais, seguimos alimentándoos con follas de moreira. Hoxe démoslle 3 follas grandes e 2 pequenas, 5 en total.

Agora mesmo temos 28 vermes e, de vez en cando, observamos que hai algún pequeniño que vai saíndo dos ovos.

A verdade é que estamos moi entusiasmados/as con eles e gústanos moito observar como medran, como cambian...

TRABALLO POR RECUNCHOS NA AULA DE 3 ANOS

Nalgúns momentos da xornada, as nenas e nenos de 4.º de Educación Infantil xogamos por recunchos. Velaquí vos deixamos unha pequena mostra dalgúns deles 😊

Recuncho da arte, neste caso dando renda solta á creatividade e á imaxinación. Somos artistas!!🎨 Tamén temos plastilina para facer creacións libres.

Recuncho de lectoescritura, onde facemos as iniciais dos nosos nomes con plastilina, comezamos a asociar algunhas das nosas letras, "lemos" contos... 📚

Recuncho do xogo simbólico, cun mercado, cociña, bonecos... 🍏🍋🍊

Recuncho de lóxica matemática, con pezas LEGO e de madeira para construcións, propostas de asociar números coa cantidade, recoñecemento de cores...

Recuncho dos animais e os coches 🐴🐶🐷🚒🚗

"Xogar é a forma favorita do noso cerebro para aprender" Diane Ackerman

XOGO: O LABIRINTO

Benvidos/as a todos/as a esta última semana de curso!! Como xa as enerxías van a menos nesta recta final e xa traballastes moito moito durante este confinamento, estes días ímosvos deixar uns xoguiños por se vos apetece pasar un cachiño con eles, vale? Xa é momento de afrouxar, así que non tedes que mandar fotos nin vídeos, só se vos apetece 😊

Ademais, ao longo destes días, se vos apetece, podedes enviar algunha receita que vós fagades, algún vídeo con algunha mensaxe para os compañeiros/as ou o que se vos ocorra e vos apeteza compartir connosco 😊

O xogo de hoxe chámase O LABIRINTO.

Primeiro de todo ímos elaborar o material para telo listo para xogar. Como ides facer? Explicámosvos.

• Cortade rolos de papel hixiénico baleiros cun ancho aproximado de 3,50cm. Tedes que facer 10 anacos.
• Unha vez tedes listos os 10 anacos, colocádeos e pegádeos dentro dunha caixa de cartón. Asegurádevos de deixar espazo suficiente para moverse o obxecto redondo.
• Cando xa estean ben pegados, escribide na parte superior das pezas os números do 1 ao 10.
• Metede dentro da caixa un pompón/bola de papel de aluminio ou calquera outro obxecto redondo.

Deixámosvos unha imaxe e un vídeo para que vos fagades unha idea de como é o xogo.

 Pasádeo ben!! 😊